Heb 9 | WSK | STEP | Den giram aniram mu te, munan saki priest ura te betera ko mu ago anikaso. Ale Kaem nup te patawomonko kuwim kako mu ago ali imi te anikaso.

Hebrews 9

Ali imi te ko kawam kako

1 Den giram aniram mu te, munan saki priest ura te betera ko mu ago anikaso. Ale Kaem nup te patawomonko kuwim kako mu ago ali imi te anikaso. ^{▼▼Heb 9:1-5 Kawam kako: Exo 25:8, 23, 30-31, 37; Exo 37:1-29; Numbers 1:50; 17:1-10; 18:2-4.} 2 Mu nuna kawam kako bo sel te patawu bangorman, ko kuwim ilagala. Se kuwim motam la mu ningi mu galep anikaso, se barim bo, se inang Kaem tuman mu barim umutang te anikaso. Kuwim umutang mu “kuwim kako” makasan.

3 Se kuwim bo guang kekawaram mu buring ko mu “kuwim kako nunguningkiri” makasan. 4 Se altar gold te nunga mu se, ko mel siring yawara awete kani sagurukko mu kuwim mu ningi anikaso. Se munan den ningi tuguma ko kuwim, tam te nungurman ale kumik te mu gold te nungurman, mu ago kuwim umutang ningi anikaso.

Se munan den ningi tuguma ko kuwim umu ningi mu mel ilagala suwan anikaso: inang manna bagunang gold ningi anikaso mu se, Aaron ko sikir merang bare gawa iru te aratam mu se, manga biling ilagala Kaem ko munan den 10 te bataguru beteman se anikaso mu karogotala umu te anikaso. 5 Se awete mu engel cherubim ilagala nunga nodora te anikaso. Se nunga nuluman mu kuwim kariimet nunga memek te siwu sapara ko mu lilim la ira muruman. Engel umutang mu kariimet te ikimon Kaem Nikitang Nunguning kuwim umutang te bagoso ma balmonko nuna uwutata bagakasan. Bare ana mel suen la imi ko dugu duap aitak tawun biya me balnakko.

6 Se mel umu suen la nunguru sapaman mu, tom suen biya priest alo kuwim gira mu ningi kasu nagukasan ale nunga ura bitakasan. 7 Bare priest supuling kota suwanta kuwim kako nunguningkiri mu ningi kasu nagukaso. Bare mu yar suwanta ningi tom suwanta butata bitakaso. Betela nu ipi me namakaso. Mena. Mu nu sipsip belelek mel nunga gue gikaso ale ago namakaso, ale kota ko memek ko Kaem tama tuikaso, ale kariimet kilek bitakasan bare nuna ikikasan memek betesan iwita mu me ko ikikasan, mu nunga memek ago la gue mu te Kaem tama tuikaso. ^{▼▼Heb 9:6-7 Priest nunga ura: Numbers 18:2-6; Exo 30:10; Lev 16:1-17.}

8 Munan umutang te Korang Bur iwita nanga kasurukaso: tom munan gira se ko kawam kako mu am anikaso ko tom mu te, kari bo ta kuwim kako nunguningkiri mu ningi me kasu nagurokko. 9 Imi kausa bo, ana kariimet aitak bagasan wore iwita nanga kasurso: kariimet mel gikasan ago taikasan ale Kaem tama tuikasan, bare mel mu nunga nongomang motam mu me nungurukaso. Mena. 10 Munan umu mu nungumik guang ko la, na yu ko, se gura duap duap, se munan duap duap, nuna te karo nama se bagomon se Kristus munan iru mu ago tairuk, asele munan mu bita tamonko. ^{▼▼Heb 9:8-10 Munan nuna bitakasan mu kausa bo, bare Jesus munan iru ago tairam: Verse 8: Heb 10:19-20. Verse 9: Heb 10:1-2. Verse 10: Col 2:16-17.}

Kristus kota ko kumik gue te tama beteram

11 Se tom Kristus munan iru, ana aitak te yawarakala bagasan imi, mu ko priest supuling ko aratam, mu nu kuwim kako kualala biya se yawarakala nunguningkiri, kari nuguting te me kaloman, se ali imi ko mel mena tala, wore ningi namaram. 12 Bare nu bulmakau gotektek se belelek nunga gue te me kasu naguram. Nu anananga dia tauk se tom suen biya baganakko, tom suwanta kota ko gue giam karogo kuwim kako nunguningkiri mu ningi kasu naguram ale te Kaem tama tuam.

13 Munan giringila mu te kariimet karur karogo mu nuna Kaem koma te namomonko me terong. ^{▼▼Heb 9:13 Ko kausa bo mu iwita: kari bo kari kuera mu nunga nungumik guang kau tauk agi, duap te namuruk agi, mu nuna balukasan “nu karur ago” makasan: Numbers 19.} Se umutang ko, priest alo belelek bulmakau nunga ilumon, ale Kaem te tama tumon, ale nunga gue gimon ale kari kumik te sapomonko. Agi bulmakau pagar mu ilumon, ale te Kaem tama tumon se kani sapuruk, se ko tama nuwi gimon ale yu ago gurugumon ale kumik te sapomonko. Asele nuna Kaem koma te diram karur mena aratomonko. Bare munan mu nungumik guang la nungokko. 14 Bare Kristus ko gue mu sokel ago, bulmakau mel nunga gue mu kiaram. Mu awuk, Kristus mu kumik te ikup bo mena. Ale nu Bur tom suen biya bagoso mu ko sokel te kota ko kumik guang te Kaem tama tuam, umutang tama betera nunguning. Buta se noko gue mu anananga nangamang motam nungok, ale munan memek te sarenga namara ko mu menawurokko mu terong mam. Umutang te ana nangamang motam guyak la Kaem marak tom suen biya bagoso mu ko nup patawu se ura ilu se baganakko.

Kristus ko gue mu den iru Kaem nago ko nungam wore sokel tuam

15 Umutang ko, Kristus mu den iru Kaem nangarak kaolam mu ko priest bagoso, se nu te kariimet Kaem nunga aru nunga giam mu marak ningo ningo, tom suen biya te bagara ko Kaem nungarukko balam, umutang tamonko. Mu awuk, nu kueram ale kariimet den giram aniram mu ko bowa ningi baga se memek bitakasan mu nunga memek siwu saparam.

16 Nina ikisan, kari me kueso tom te, mu ana nu kueruk se aguwaya betenakko nanga manarso mu ko den am ikisan. Nu kueso mu te asele den nanga maonam mu ko nunguning aratoso. 18 Umutang ko, den Kaem Moses ilak nungam mu betelatala gue kaparam asele sokel ago anikaso. 19 Moses giram Law Den mu ko den suen la kariimet nunga manaru saparam. Asele udagi te nu bulmakau gotektek ko gue mu yu ago biguwuram. Ale tam hyssop, sipsip mone guaram mu te kaloman mu tam, ale yu gue ago mu te iluwam ale sisupukaso se munan den bataguru beteman mu awete se, kariimet suen la nungumik te, kapa kapa namakaso. 20 Se balukaso, “Gue imi den Kaem nengerak kaolam ale nina karo tualko balam wore sokel tuso.” 21 Butatala, nu kawam kako sel, se ko taiwir mel suen biya mu karogo gue awete waram sisupuram. 22 Law Den te mu nuna mel suen biya uwutata mu gue te la karur menawukasan ale kako awukasan. Gue me kapuruk, mu memek te siwura ko lage bo mena. ^{▼▼Heb 9:19-22 Moses Law Den mu melsak gue te sokel tuam: Exo 24:3, 6-8; Lev 17:11.}

Kristus nanga memek siwurokko tama beteram

23 Kawam kako se ko mel suen la agotala mu mel nunguning duruk wonong te aniso wore ko koma tata iwita, se nuna bulmakau mel nunga gue te mel mu karur menawukasan ale kako awukasan. Bare mel nunguning duruk wonong te aniso mu ali imi ko tama betera mu me kako awurokko, bare tama nunguning Kristus beteram umutang karogo terong mam. 24 Buta se Kristus mu kawam kako kari nuguting te kaloman mu ningi me namaram, mena, mu awuk, kuwim umu mu kuwim nunguning duruk te aniso wore am ko koma tata iwita. Bare Kristus duruk wonong diram ningi namaram, ale aitak mu te ana nogo ko Kaem koma dugu te bagoso. ^{▼▼Heb 9:24 Kristus ana nago ko Kaem koma dugu te bagoso: 1 John 2:1-2.}

25 Betelatala, priest supuling yar suen biya ningi bulmakau mel ko gue gikaso, ago nama kuwim kako nunguningkiri mu ningi kasu nagukaso. Bare anananga priest supuling Kristus mu uwuta me beteram. Nu tom suwanta kota ko kumik guang te tama beteram, ale duruk wonong mu ningi namaram. 26 Uwuta mena ale mu, tom Kaem ali beteram tai aitak, Kristus tom suen biya nanga sangukko kuakaso ale. Bare mena. Nu tom nukum te ali imi te tairam ale nanga memek siwu sapurukko tom suwanta kota ko kumik guang te Kaem tama tuam.

27 Kariimet suen biya tom suwanta ko kuesan, se udagi te umutang Kaem nunga tuterukko. Butatala, Kristus tom suwanta ko, kariimet suen biya nunga memek siwurokko tama beteram ale kueram. Ale nu akingtala tairukko. Bare memek siwurokko mu ko mena. Mu nu awiriya nu tairukko ko kimi bita se bagasan, mu tairuk nunga sangaru taukko.

28